Datganiad Canlyniadau Graddau

Dangosir proffil dosbarthiadau graddau Prifysgol Abertawe ar gyfer blynyddoedd academaidd 2018/19 i 2024-25 yn y tabl isod:

*Daw'r ffigurau yn 2024/25 o ddadansoddiad mewnol.  Mae data o'r blynyddoedd blaenorol yn seiliedig ar ddata HESA a all gynnwys amrywiadau mewn diffiniadau i gyrraedd y boblogaeth o fyfyrwyr.

Canlyniadau Gradd

Mae'r data'n dangos bod proffil y Brifysgol o Anrhydedd Dosbarth Cyntaf ac Anrhydedd Ail Ddosbarth Uwch wedi cynyddu 1.9% a 0.5% yn y drefn honno.  

**Mae ffigurau heb eu dosbarthu yn cael eu cyfrifo ar wahân ac felly nid ydynt yn cyfrannu at gyfanswm y canlyniadau a ddarperir uchod.

Mae'r Brifysgol wedi parhau i gynnal safonau a gwella ansawdd rhaglenni'r Brifysgol, er mwyn sicrhau bod myfyrwyr yn cael y cyfle gorau i raddio â graddau dosbarth cyntaf neu ail ddosbarth uwch ac i'w galluogi i sicrhau cyflogaeth i raddedigion. 

Mae twf ym mhroffil y canlyniadau gradd, yn enwedig canlyniadau Dosbarth Cyntaf ac Ail Ddosbarth Uwch, i'w briodoli i ystod o ffactorau sy'n canolbwyntio ar wella ansawdd, safonau a phrofiad y myfyriwr:

• Gwelliannau parhaus mewn dysgu ac addysgu, asesu, profiad myfyrwyr a chymorth i fyfyrwyr, gan gynnwys Tiwtora Personol, sydd wedi effeithio'n gadarnhaol ar berfformiad a chanlyniadau myfyrwyr.
• Canolbwyntio ar feysydd pwnc gwannach, a gwelliannau yn y meysydd hynny, sy'n rhoi mwy o gysondeb ar draws y portffolio. Mae'r Brifysgol yn adolygu'n gyson ar draws ystod o fetrigau perfformiad modiwlau a rhaglenni, ac mae hyn yn cynnwys ehangder canlyniadau graddau, ar draws yr ystod a ddyfarnwyd. Bydd hyn yn parhau wrth weithredu Monitro Gwella Parhaus ac, yn ôl yr angen, ymyriadau wedi'u targedu.

Graddau Da

Mae Graddau Da yn fesur a ddefnyddir mewn tablau cynghrair sy'n cyfrifo canran y canlyniadau gradd ar ddosbarthiad 1af neu 2:1.

*Daw'r ffigurau yn 2024/25 o ddadansoddiad mewnol.  Mae data o'r blynyddoedd blaenorol yn seiliedig ar ddata HESA a all gynnwys amrywiadau mewn diffiniadau i gyrraedd y boblogaeth o fyfyrwyr.

Mae'r data'n dangos bod proffil y Brifysgol o raddau Anrhydedd Dosbarth Cyntaf ac Anrhydedd Ail Ddosbarth Uwch ar y cyd wedi cynyddu 2.6% o’i gymharu â 2023/24. Roedd rhywfaint o amrywiad ym mherfformiad y Brifysgol o'i gymharu â'r sector yn 2023/24, fodd bynnag, bydd y data cymharol ar gael ym mis Ionawr 2026 i nodi'r perfformiad presennol.

Ar gyfer pob rhaglen, mae deilliannau dysgu ac asesu yn cael eu mapio'n glir yn erbyn Côd Ansawdd yr Asiantaeth Sicrhau Ansawdd (ASA), yn bodloni gofynion Cyrff Proffesiynol, Statudol a Rheoliadol (PSRB), yn ystyried datganiadau meincnod pwnc ASA ac yn cyd-fynd â'r Fframwaith ar gyfer Cymwysterau Addysg Uwch a Fframwaith Credyd a Chymwysterau Cymru. Mae hyn yn rhoi sicrwydd bod safonau gradd yn cael eu cynnal a bod arbenigwyr allanol, (cynrychiolwyr PSRB, defnyddwyr gwasanaeth, myfyrwyr, cyflogwyr, rhanddeiliaid) yn hysbysu ac yn sicrhau ansawdd ein rhaglenni.

Mae Polisi Asesu, Marcio ac Adborth  y Brifysgol (diweddarwyd yn 2025) yn darparu egwyddorion asesu a gofynion ac yn hyrwyddo gwelliant mewn arferion asesu. Mae'r Polisi yn cynnwys gofynion ar gyfer marcio a dylunio asesiadau, a dolenni i reoliadau'r Brifysgol ar gyfer Asesu a Dyfarnu. Mae dylunio asesiadau a marcio hefyd yn cael ei oruchwylio gan Arholwyr Allanol arbenigol, sy'n adolygu ac yn cymeradwyo dyluniad asesiadau i sicrhau cysondeb a dilysrwydd ac yn darparu adroddiad blynyddol ar brosesau asesu ac yn mynychu'r Byrddau Arholi perthnasol.

Mae newidiadau diweddar i'r polisi wedi mynd i'r afael â'r meysydd allweddol canlynol:

• Cymedroli maint sampl ac egluro'r gofynion sylfaenol
• Eglurhad ar farcio asesiadau a marciau modiwlau sy'n diweddu â 9
• Gwelliannau i hyrwyddo addasiadau rhesymol ac arferion asesu cynhwysol
• Gwelliannau i sicrhau safonau sy'n ystyried AI Cynhyrchiol
• Eglurhad / Gwelliant o ran gweithio gyda phartneriaid

Gwnaed diwygiadau ychwanegol hefyd i gefnogi Asesu yn Gymraeg/mewn Iaith Arall ac alinio â'r polisi Asesu, Marcio ac Adborth ehangach. Yn ogystal, cynhaliwyd adolygiad i lunio taflen flaen well i asesiadau er mwyn darparu datrysiad symlach ac awtomataidd mewn un lleoliad a sefydlu cysondeb ar draws y cyfadrannau.

Diwygiwyd y polisi Addasiadau Rhesymol hefyd yn 2024/25 i ymgorffori'r canllawiau a ddarparwyd gan ganllawiau'r Cyngor Cydraddoldeb a Hawliau Dynol yn dilyn dyfarniad yr uchel lys ar achos Natasha Abrahart. Mae hyn yn darparu cymorth ac arweiniad ychwanegol i staff a myfyrwyr ynghylch addasiadau rhesymol, yn enwedig wrth egluro terminoleg, gan ddarparu enghreifftiau ac amlinellu prosesau clir.

Ategir y gwaith o weithredu'r polisi gan Gôd Ymarfer helaeth ar gyfer Dysgu, Addysgu ac Asesu a chan HYPERLINK "https://www.swansea.ac.uk/salt/"Academi Dysgu ac Addysgu Abertawe a'r prosiect parhaus i Drawsnewid y Cwricwlwm.

Yn ogystal, mae'n ofynnol i'r holl staff academaidd sy'n newydd i fyd addysg uwch gwblhau'r Tystysgrif Ôl-raddedig mewn Addysg Uwch, lle cânt eu cyflwyno i Gôd Ansawdd yr ASA, pob agwedd ar ddylunio rhaglenni ac asesu a phrosesau sicrhau ansawdd. Mae Academi Dysgu ac Addysgu Abertawe yn darparu gweithdai pellach sy'n ymdrin â phob agwedd ar asesu a marcio.

Yn ogystal â hyn, mae'r holl asesiadau yn cael eu hadolygu fel rhan o'r prosiect Trawsnewid Cwricwlwm ehangach. Mae'r adolygiad hwn o asesiadau yn rhoi cyfle i sicrhau bod pob asesiad yn:

• Cyd-fynd â deilliannau dysgu ar lefel rhaglenni a modiwlau
• Asesiadau o ansawdd uchel sy'n optimeiddio amser marcio ac nid ydynt yn llethu myfyrwyr na staff
• Asesiadau o ansawdd uchel sy'n mesur cynnydd myfyrwyr ac yn meithrin dysgu a chyfranogiad
• Darparu adborth ystyrlon i gefnogi myfyrwyr yn eu haseiniadau yn y dyfodol

Uniondeb Academaidd

Parhau â'r gwaith a wnaed ar draws y sefydliad fel rhan o'r rhaglen o weithgareddau gwella 'Ymlaen'; gwnaed rhagor o ddiwygiadau i weithdrefnau Uniondeb Academaidd i sicrhau gwerthuso ac adolygu parhaus yn ogystal ag ymateb i'r dirwedd sy'n newid. 

Mae'r gwelliannau allweddol wedi cynnwys:

• Eglurder ynglŷn â'r broses arholiadau
• Eglurder ynghylch prosesau cyfathrebu â myfyrwyr
• Eglurder ynglŷn â chanllawiau ar arholiadau llafar
• Canllawiau ychwanegol ar y dystiolaeth y mae ei hangen
• Symleiddio prosesau a systemau

Oherwydd y defnydd eang o Ddeallusrwydd Artiffisial Cynhyrchiol, mae newidiadau ac ystyriaethau ychwanegol i bolisi ac ymarfer yn ofynnol. Darparwyd rhagor o eglurhad ac arweiniad ym mhob polisi perthnasol i sicrhau bod staff a myfyrwyr yn gyfarwydd â'r sefyllfa sefydliadol ar GenAI mewn perthynas ag asesu ac uniondeb academaidd.

Mae llywodraethu academaidd yn hanfodol er mwyn diogelu gwerth cymwysterau a ddyfernir gan y Brifysgol. Mae Pwyllgor Addysg y Brifysgol yn gyfrifol am oruchwylio Ansawdd a Safonau ac mae'n darparu adroddiad blynyddol i Gyngor y Brifysgol (Llywodraethwyr), sy'n rhoi sicrwydd iddynt fod ansawdd a safonau'n cael eu cynnal. Cynhaliwyd Adolygiad Gwella Ansawdd yr Asiantaeth Sicrhau Ansawdd (QAA) ym mis Tachwedd 2020, yn unol â gofynion Fframwaith Asesu Ansawdd Cymru, a bydd y pwynt adolygu nesaf ym mis Mai 2026. 

Law yn llaw â'r adolygiad hwn, gofynnir i'r Llywodraethwyr gadarnhau nifer o ddatganiadau yn flynyddol fel rhan o Fframwaith Asesu Ansawdd Cymru, gan gynnwys, ar gyfer darparwyr sydd â phwerau dyfarnu graddau, bod safonau'r dyfarniadau maen nhw'n gyfrifol amdanynt wedi'u gosod a'u cynnal yn briodol. 

Er mwyn cynorthwyo'r Llywodraethwyr i sicrhau'r sicrwydd hwnnw, mae dull adrodd sy'n bwydo drwy'r sefydliad drwy Bwyllgorau a Byrddau Sicrhau Ansawdd ar lefel Cyfadran/Ysgol a Sefydliad i Bwyllgor Addysg y Brifysgol. Mae Bwrdd Partneriaeth Cydweithredol hefyd, sy'n goruchwylio'r holl drefniadau Partneriaeth. Gyda'i gilydd, mae'r strwythur llywodraethu hwn yn sicrhau bod grym yn nwylo'r cyrff lleol, ond mae gan y Brifysgol oruchwyliaeth glir o ansawdd a safonau.

Drwy gydol 2023/24, adolygwyd y fframweithiau llywodraethu addysg a'r prosesau sicrhau ansawdd i sicrhau eu bod yn parhau i fod yn addas at y diben, yn effeithlon ac yn effeithiol.  Arweiniodd hyn at fframwaith llywodraethu addysg wedi'i ailddiffinio a'i symleiddio, a gweithredwyd dulliau sicrhau a gwella ansawdd newydd yn 2024/25 i gefnogi dull 'gwella parhaus' sy'n ymateb i brofiad y myfyrwyr.

Gyda ffocws clir ar wella parhaus, diwygiwyd prosesau adolygu ansawdd mewnol hefyd i ddarparu myfyrio parhaus, dadansoddi data, cynllunio gweithredu a gwerthuso. Mae'r dull Monitro Gwella Parhaus wedi dileu'r angen am Adolygu Rhaglenni Blynyddol ac Adolygu Ansawdd, gan ffafrio pwyntiau myfyrio parhaus a lleihau'r baich gweinyddol. Mae'r dull newydd hefyd yn cefnogi gweithgareddau cynllunio gweithredu a gwella mwy ymatebol sy'n amserol ac yn effeithiol.

Mae'r Arholwyr Allanol a'r Arbenigwyr Pwnc Allanol yn hanfodol yn y gwaith o ddylunio, cymeradwyo ac adolygu rhaglenni yn barhaus, ac maen nhw'n cymryd rhan ym mhob dyluniad neu adolygiad o raglenni.  Ar lefel sefydliad, mae'r Bwrdd Dilyniant a Dyfarniadau yn derbyn adroddiad Arholwr Allanol ar lefel Cyfadran/Ysgol ac yn darparu adroddiad sefydliadol i Bwyllgor Addysg y Brifysgol. Mae'n ofynnol i gyfadrannau/ysgolion ddarparu ymateb ar lefel leol, ac mae'r Brifysgol yn goruchwylio ac yn ymateb i unrhyw gamau sy'n cael eu cymryd mewn ymateb i Adroddiadau Arholwr Allanol ar lefel sefydliad.

Fel rhan o'r dull Monitro Gwella Parhaus, roedd y sefydliad yn awyddus i gynnal arbenigedd allanol cryf. Adolygwyd prosesau Arholwyr Allanol a gweithredwyd y datblygiadau allweddol canlynol yn 2024/25:

• Timau Rhaglenni i ddefnyddio arbenigedd ac argaeledd Arholwyr Allanol presennol cyn enwebu Arholwyr Allanol i amnewid, neu Arholwyr Allanol ar gyfer rhaglenni newydd.

• Ymestyn contractau Arholwr Allanol yn awtomatig pan nad oes unrhyw faterion sy'n peri pryder (5 mlynedd yw'r uchafswm deiliadaeth).  

• Gweithredu ffi unffurf, a chaiff taliad 'codiad' ychwanegol ar gyfer pob rhaglen ychwanegol ei ychwanegu at bortffolio Arholwr Allanol.  (Gyda diweddariad pellach ar gyfer 2025/26 ar gyfer taliadau ychwanegol)

• Ffïoedd Arholwr Allanol newydd i'w rhoi ar waith o fis Medi 2024.  

• Arholwyr Allanol i ymweld â Phrifysgol Abertawe unwaith yn ystod y ddaliadaeth.  

Mae rheoliadau dosbarthiad  Prifysgol Abertawe yn cael eu cyhoeddi yn y Rheoliadau Academaidd. Mae'r rheoliadau hyn yn cael eu hadolygu'n barhaus.

Fel arfer, bydd dosbarth gradd yr ymgeisydd yn cael ei bennu gan y marc cyfartalog wedi'i bwysoli ar gyfer pob modiwl, gan gynnwys marciau'r methiannau a oddefir, gan gyfrannu at yr asesiad anrhydedd gan ddefnyddio'r ffiniau dosbarthiad canlynol:

Band 3: Y marciau gorau a enillwyd mewn 80 credyd a ddilynwyd ar Lefel 6, â phwysiad o 3
Band 2: Y marciau Lefel 6 o’r 40 credyd a ddilynwyd sy’n weddill a’r marciau gorau a enillwyd mewn 40 credyd a ddilynwyd ar Lefel 5, â phwysiad o 2
Band 1: Y marciau a enillwyd yn y credydau Lefel 5 a ddilynwyd sy’n weddill, â phwysiad o 1

Yna defnyddir fformiwla i gyfrifo'r cyfartaledd dosbarthiad gradd.

Cyfle: Gellir ystyried myfyrwyr sydd o fewn 2% o'r ffin ddosbarthu i'w dyrchafu i'r dosbarthiad nesaf os ydyn nhw'n bodloni'r meini prawf canlynol.

Yr Egwyddor Mwyafrif: Er mwyn dyfarnu’r dosbarthiad uwch, mae’n rhaid bod myfyriwr wedi ennill marciau ym mand y dosbarthiad uwch mewn modiwlau â phwysiad credydau gwerth o leiaf hanner y rheiny sy’n cyfrannu at ddosbarthiad y radd.

Yr Egwyddor Cyflymder Gadael: Bydd Bwrdd Dilyniant a Dyfarnu'r Brifysgol yn ystyried cyfartaledd y flwyddyn astudio olaf heb bwysiad. Pan fydd cyfartaledd blwyddyn olaf myfyriwr ym mand y dosbarthiad uwch, bydd Bwrdd Dilyniant a Dyfarnu'r Brifysgol yn dyfarnu gradd yn y dosbarth uwch fel arfer.

Trawsnewid y Cwricwlwm

Mae'r sefydliad wedi cychwyn prosiect sylweddol i Drawsnewid y Cwricwlwm. Prif nodau'r prosiect Trawsnewid y Cwricwlwm yw creu profiad addysgol mwy cadarnhaol a chyfoethog i fyfyrwyr a staff; Cwricwlwm mwy hyblyg ac addasadwy sy'n gweddu i anghenion myfyrwyr amrywiol; cynnig gwell i ddatblygu sgiliau myfyrwyr a chyfleoedd sydd ar gael iddynt; mwy o ystwythder a chystadleuaeth mewn marchnadoedd lleol a byd-eang; rhaglenni sy'n llai cymhleth ac sy'n fwy effeithiol a gwydn, ac sy'n cael eu rheoli'n hawdd.  

Hyd yma mae'r prosiect wedi cymeradwyo 45 rhaglen, 22 rhaglen wedi'u hailgynllunio a'u cymeradwyo ar gyfer dechrau Medi 2026 yn ychwanegol at y 23 rhaglen a gymeradwywyd ar gyfer dechrau 2025. Mae 14 rhaglen arall yn cael eu hadolygu ar hyn o bryd a bydd gweddill y rhaglenni yn cael eu cwblhau a'u cymeradwyo erbyn mis Rhagfyr 2025.

Ochr yn ochr â monitro rheolaidd, mae'r Brifysgol wedi bod yn canolbwyntio ar wella profiad myfyrwyr yn barhaus, gan ymdrechu'n benodol i wella yn y meysydd allweddol sy'n effeithio'n uniongyrchol ar berfformiad myfyrwyr. 

Gwelliannau wedi'u targedu:

Yn 2023/24 cyflwynodd y brifysgol 'Ymyriadau wedi'u Targedu' yn y meysydd pwnc yr oedd arnynt angen  cymorth sylweddol i wella eu canlyniadau yn yr Arolwg Cenedlaethol o Fyfyrwyr. Gwerthuswyd y dull yn dilyn canlyniadau 2024 yr Arolwg hwnnw a gwnaed gwelliannau ar gyfer 2024/25.

Dangosodd canlyniadau'r Gwelliannau wedi'u Targedu yn 2023/24 a 2024/25 welliannau ym mhob pwnc yn y mwyafrif o feysydd thematig yr Arolwg mewnol o Brofiad Myfyrwyr a'r Arolwg Cenedlaethol o Fyfyrwyr, a bu gwelliant o 3.9% ar gyfartaledd ar lefel thematig. Ers hynny, mae'r broses wedi'i hymgorffori yn y system Monitro Gwella Parhaus a gyflwynwyd yn 2024/25 ac fe'i hail-lansiwyd tua dechrau 2025/26.

Dysgu, Addysgu ac Asesu

Mae'r Brifysgol yn parhau i ganolbwyntio ei hymdrechion ar wella meysydd allweddol o brofiad myfyrwyr, gwella darpariaeth ac ansawdd. Mae'r sefydliad wedi canolbwyntio ar ymyrraeth gynharach mewn dysgu, addysgu ac asesu gyda phwyslais ychwanegol ar adborth myfyrwyr y tu allan i'r Arolwg Cenedlaethol o Fyfyrwyr. Mae arolygon mewnol o brofiad myfyrwyr ar gyfer israddedigion ac ôl-raddedigion wedi darparu pwyntiau ymyrraeth gynharach, rhagor o eglurder ar flaenoriaethau a golwg hydredol ar brofiad y myfyriwr. Mae'r arolygon hyn, ynghyd â ffynonellau eraill o adborth myfyrwyr drwy Unitu ac adborth modiwlau, yn allweddol i weithgareddau gwella ac ymyrraeth gynharach ar lefel y rhaglen, yr ysgol, y gyfadran a'r sefydliad ac maent wedi bod yn elfen allweddol o'r Gwelliannau wedi'u Targedu a grybwyllir uchod.

Cafwyd gwelliannau yn yr Arolwg Cenedlaethol o Fyfyrwyr o ran y sgoriau a'n safle yn y sector, gan atgyfnerthu'r gweithgarwch gwella parhaus a chymesuredd â'r sector.  Fodd bynnag, mae'r Brifysgol yn parhau i fod yn ymrwymedig i wella profiad y myfyrwyr drwy roi ffocws allweddol ar addysgu gafaelgar, adborth amserol ac adborth adeiladol i ategu aseiniadau yn y dyfodol, a chau'r ddolen adborth. Mae dadansoddiad o ddata ansoddol yn cydberthyn â hyn ond yn darparu cyd-destun ychwanegol i alluogi gweithgareddau gwella wedi'u targedu i ategu profiad y myfyriwr.